ROXAS CITY – Dismayado ang punong barangay sang Barangay Liong sining siyudad matapos nga wala pa sang nagakaigo nga solusyon ang iya ginfile nga reklamo sa City Council batuk kay SK Chairman Herra Huecas.
Suno kay Punong Barangay Romeo Doloso nga nagpalab-ot na ini sang reklamo sa Committee on Good Governance sa pagpamuno ni City Councilor Atty. Albert Gregory Potato sa diin tubtob subong ginahulat sa gihapon nila ang desisyon sang konseho para sa posisyon sang nasambit nga Sk Chairman.
Dugang pa ni Doloso nga indi pa ini maresolbar sang City Council bangud ginahulat pa nila ang sabat ni Huecas angut diri.
Mahibaluan nga gindangop ni Doloso ang reklamo sini sa konseho sang siyudad bangud sang kapaslawan ni Huecas nga makapakita kag magtambong sa ila ginapatigayon nga sessions sa sulod sang halos pila ka bulan.
Matandaan sang nakaligad nga bulan sang Enero pa sang ulihi sila naghinalaay ni Huecas kag ginpahibalo siya nga magatulak ini padulong sa pungsod Japan para sa iya pagtuon.
Suno kay Doloso, ginpanugyanan niya si Huecas nga mag-abiso anay sa talatapan sang Department of Interior and Local Government (DILG) apang sa baylo nga sundon, ginhambalan lamang siya ni Huecas nga indi niya ini pagdalahigon.
Panindugan ni Doloso nga ang wala pagpakita ni Huecas sang masobra anom ka bulan ang ‘ground’ agud mapahalin ini sa pwesto sandig sa Section 18 sang Republic Act 10742 ukon SK Reform Act.
Sa pagpangusisa ni Doloso natukiban nga naga-eskwela sang foreign language si Huecas sa pungsod Japan.
