Ginapanindugan sang Punong Barangay sang Barangay Lonoy nga makapamatuod ini angut sa alegasyon sa ginapahayag yara sa likod sang pagpanghalit sang ila nga Barangay Hall.
Matandaan nga ginkilala ang ginaalegar may kahimuan sa pagpang-abusar sa ila barangay hall amo si Jose Ureta nga residente man sang ila lugar.
Sa interview sang Bombo Radyo kay Punong Barangay Ferdinand Valles, sang Barangay Lonoy, ginpahayag nga may yara sang CCTV footage nga makapamatuod nga si Ureta ang yara mismo sa likod sini pati na ang mga tawo nga kaupod sini sang gab-e nga natabo ang pagpang-abusar.
Pahayag pa ni Valles nga indi pa sini mapaguha ang kopya sang CCTV footage bangud ginturn-over pa ini sa otoridad agud mas ma-imbestigaran ang natabo.
Dugang pa sang Punong Barangay nga indi sila ang dapat nga magpalapit sa natungdan bangud may proseso kag kinahanglan nga ang nakasala ang magpadulong sa ila talatapan agud atubangon ang iya nahimo nga sala.
Madumduman nga sang nakaligad nga adlaw ekslusibo nga nagpa-interview si Ureta sa Bombo Radyo agud nga klaruhon ang iya nga pangalan kag hugot sini nga ginpanginwala nga siya ang may kahimuan.
Apang, mismo ang iya pamilya ang nagahambal nga matuod ang alegasyon nga ginahaboy sa ila nga utod nga siya ang naghimo sini.
Sa karon, ginahulat nalang ni PB Valles ang kapulisan angut sa imbestigasyon nga ginahimo agud matul-id na ang kamatuuran.
