ROXAS CITY-Gin-athag sang Punong Barangay sang Barangay Lonoy banwa sang Sapian wala ini kahibalo nga bukbokon ang bugas nga ila nga ginpanghatag sa ila nga mga residente sa nasambit nga lugar.
Ini ang ginpaathag ni Punong Barangay Pancho Horario kasunod sang reklamo nga palab-ut sang isa ka concern citizen sa Bombo Radyo natuhoy sa ginaalegar bukbokon nga bugas nga ila nga ginpanagtag.
Ginpahayag ni Horario nga wala ini nakahibalo nga bukbokon ang nasambit nga bugas bangod wala man sang residente nga nagpadulong sa iya talatapan agud ireklamo ang nasambit nga bugas.
Ginkakibot gid lamang sini nga may yara na sang nagreklamo sa Bombo Radyo.
Pa-athag sang opisyal nga gikan sa LGU ang mga nasambit nga bugas apang aminado ini nga wala na nila ginsekyar kun may yara sang bokbok ang nasambit nga bugas bangud nakaputos na ini sa plastik sang ila nga ginkuha sa munisipiyo.
Gindugang pa sang opisyal nga wala ini nagalaum nga may yara sang mareklamo bangud tuman man ang kalipay sang mga residente nga nakabaton sang bugas.
Samtang ginklaro ni Horario nga wala ini sang ideya kun madugay na ini nga ginatago sang LGU sa bodega bangud ginmanduan gid lamang sila sang alkalde nga magpanagtag sang nasambit nga bugas.
Mahibaluan nga masobra 1,000 ka mga residente ang nakabaton sang nasambit nga bugas sa Barangay Lonoy.
