SIGMA,CAPIZ – Kasubong nga na-trauma si Barangay Kapitana Gilda Bignayan sang Barangay Pinamalatican, Sigma, Capiz sa natabo nga pagtiro kay Barangay Kagawad Lamberto Fajartin sa 2nd floor sang ila nga barangay hall.
Ginpahayag ni Punong barangay Bigynayan nga mabatyagan pa sini ang pagpalangurog sang iya lawas sa tagsa ka magbalik sa iya paino ino ang nasaksihan sang duha ka mata nga insedente.
Suno sa opisyal pila ka adlaw antes ang insedente may impormasyon nga nakalab-ot sa iya nga may mga tawo nga naga-mata sa balay ni Kagawad Fajartin.
Wala man nakasugid sa punong barangay ang biktima nga may death threat ini nga nabaton.
Ba-se sa panaysayon ni Kapitan Bignayan nga yara sila sa 2nd floor sang ila barangay hall kag nagapanghimos na matapos ang ila paghinun-anon kaupod ang barangay secretary, treasurer, anak sang ila treasurer kag ang biktima sang nagsulod ang duha ka mga lalaki nga nakasuksok sang face mask kag ginpamangkot kun diin si Kagawad Fajartin.
Apang gilayon nga nagsabat si Kapitan Bigynayan nga nagpauli na ang biktima.
Kasunod sini ang pagtutuk sa iya sang armas sang mga suspek kag pagmandu sa ila tanan nga magHapa.
Sa pihak sang pagpangabay sang biktima sa mga suspek nga paathagan ini kun ano ang iya nahimo nga sala, wala siya ginpamatian sang duha kag hinali nga ginluthang.
Madasig nga nagpanaug ang mga suspek sang ila makita nga wala na nagahulag ang biktima.
Sang makita ni Kapitan Bignayan nga naghulag si Kagawad Fajartin, ginhambalan sini ang mga kaupdanan nga buhi pa ang biktima kag gilayon gindala sa ospital kaupod ang mga nagresponde nga mga residente.
Natigayon pa nga mapamangkot sang punong barangay ang biktima kun may death threat ini nga nabaton nga ginsabat ni Fajartin nga wala.
Apang nahibaluan nga may ginsugid sa iya pamilya nga pangalan sang posible yara sa likod sang pagpapatay sa iya.
Sa karon nagdihon sang lihok ang konseho sang Barangay Pinamalatican nga tsekyaron ang mga nagakadto kag nagasulod sa barangay hall para man sa ila seguridad.
