ROXAS CITY – Ginklaro sang punong barangay sang Barangay Vizcaya, President Roxas, Capiz nga wala sang kamatuoran nga hungod sini nga ginpauntat ang ginapatigayon nga caucus sang isa ka partido sa mga housing units sa Vizcayaville sa amo nga lugar.
Suno kay Punong Barangay Melchor Ubal, may nagdangop sa iya nga isa ka residente sa lugar kag nagpabutyag nga nagatuga sang gahod sa lugar kag nagasablag pa sa dalan ang ginapatigayon nga aktibidad sang nasambit nga grupo.
Ginpahayag ni Ubal nga sa iya pag-abot sa lugar sakay sa multicab, matawhay niya nga ginpadulungan si SB Member Nonong Dela Cruz kag gin-usisa kun may yara sila sang permit sa pagpatigayon sang caucus bangud siya mismo nga punong barangay ang wala nakahibalo angut sa nasambit nga caucus.
Wala sang kamatuoran suno kay Ubal nga iya ginpauntat ang caucus kag ginharass ang mga kandidato bangud nagaisahanon lamang siya kag matawhay nga nagpalapit sa ila.
Sa pagkamatuod suno sa iya, siya pa ang ginhambalan sang malain nga mga tinaga sa mikropono sang makalakat na ini.
Gindugang pa ni Ubal nga wala man sang problema sa iya ang pagpatigayon sang caucus sa lugar apang kuntani ginpahibalo man ini bilang siya ang nagaserbi nga punong barangay sa lugar.
Suno pa sa iya nga kun napahibalo lamang siya angut sa amo nga aktibidad, kuntani nahatagan pa sini sang mas maayo nga venue ang grupo para sa ila nga caucus.
