ROXAS CITY – Ginkompirmar sang Punong Barangay sa Barangay Acbo banwa sang Sigma nga may pila ka mga residente nga gikan sa iban nga mga lugar ang nagpatigayon sang hublag protesta agud magpamatuk sa pagpatindog sang Sanitary Landfill sa amo nga lugar.
Sa interview sang Bombo Radyo kay Punong Barangay Bernard Paul Ponsaran nga una na ginpaintiendi sini sa iya masobra 1,200 ka mga residente ang tinutuyo sang Ecological Solid Waste Management sa nasambit nga barangay.
Suno kay Ponsaran nga iya man mismo pamilya ang tag-iya sang duta nga luyag baklon sang gobyerno probinsyal.
Nagpadulong pa sa lugar ang pila ka mga opisyal sang lokal nga gobyerno sang Sigma sa lugar agud tsekyaron kag ipaintiendi sa mga tawo ang tinutuyo sang probinsya kun sa diin ginpaboran man ini sang halos kadam-an.
Samtang, ginkatingala sini nga madamo na nga mga residente ang nagpamatuk sa nasambit nga plano kun sa diin nagikan pa sa Roxas, Iloilo kag iban nga mga kabarangayan kag kabanwahanan sa probinsya.
Aminado man si Ponsaran nga bisan siya mismo indi niya luyag nga magpatindog sang Sanitary Landfill sa amo nga lugar.
Apang, naintiendihan man sini ang tinutuyo sang probinsya kag CAPENRO nga pagpatindog sang Ecological Solid Waste Management.
Samtang, nagapati ang amo nga opisyal nga posible may yara sang kahilabtanan sa pulitika ang mga tawo nga nagpamatuk sa nasambit nga plano sang probinsya.
