ROXAS CITY – Ginkompirmar ni Punong Barangay Arturo Aragon nga wala nagpakig-angut sa iya ang City Disaster Risk Reduction and Management Office ukon CDRRMO natuhoy sa pagpalubong sa una na nga COVID-19 Suspected Case sa Cagay Cemetery sang amo nga barangay.
Suno kay Aragon nga ulihi na sini nabal-an nga may yara sang ginlubong nga isa ka COVID-19 Suspected Case sa nasambit nga patyo.
Ginpahayag sini nga kun mahimo nga ipalab-ot man sang nagakaigo nga ahensya ang kasubong sini nga impormasyon agud nga may yara man sila sang ihibalo sa mga nagakahinabo sa ila nga barangay.
Nagpabutyag naman si Aragon sang iya pagpakig-unong kag pagpangasubo sa pamilya sang napatay nga tricycle driver nga gindudahan nga COVID-19 suspected case kag ginbalibaran sang lima ka mga ospital sa siyudad.
Dugang pa sini nga kun mahimo untaton anay ang mga diskriminasyon sa mga pasyente nga nagasuprehir sang iban nga balatian.
Bangud diri, ginpakamaayo na lamang nga ipaidalom sa strict home quarantine ang siyam ka miyembro sang pamilya sang napatay nga pasyente nga nakaupod sini agud masiguro ang ila man nga kahimtangan.
Samtang, nagpanugyan naman si Aragon sa mga pumuluyo sang Barangay Cagay sining siyudad nga magsunod gid sa mga nagakaigo nga minimum health standards agud malikawan ang pagdamo sang kaso sang COVID-19 sa ila nga barangay.
