ROXAS CITY – Ginkompirmar sang punong barangay sang Barangay Concienica sa banwa sang Panitan nga mabuot nga tawo kag wala sang kontra sa ila barangay ang napatay nga bookkeeper matapos nga ginluthang sang riding in tandem sa Barangay Agbabadiang sang nasambit man nga banwa.
Ini ang ginpahayag ni Punong Barangay Jessie Dangan sang mainterview sang Bombo Radyo.
Ginkilala ang biktima nga si Joey Fegarido 51-anyos, BookKeeper kag residente sang Barangay Conciencia sang nasambit nga banwa.
Suno kay Dangan nga humalin sang nagpungko ini bilang punong barangay ginkuha sini si Fegarido bilang bookkeeper sa ila nga barangay.
Apang, wala sini ginalaoman nga patyon ini sang duha ka wala matumod nga mga suspek bangud malipayon ini nga tawo.
Dugang pa sini nga antes ini mangin bookkeeper sa ila nga barangay nagserbi pa ini bilang chief tanod sang ila barangay.
Samtang, ginpahayag naman ni Police Corporal Mark Rendon, imbestigador sang Panitan Muncipal Police Station nga wala pa gid subong matumod ang mga suspek nga nagpatay sa nasambit nga biktima.
Dugang pa sini nga may yara man sila sang may gin-secure nga CCTV footages apang wala nila nakita ukon natumod ang mga suspek nga sakay sa motorsiklo.
Matandaan nga nagamaneho sang tricycle ang biktima papuli na kuntani sa ila nga balay gikan sa banwa sang Pontevedra matapos nga nagbakal sang semento hinali na lamang ini nga ginluthang patay sang duha ka wala matumod nga suspek nga sakay sa motorsiklo.
Gilayon naman nga gindala sa Bailan District Hospital ang biktima apang gindeklarar naman ini nga dead on arrival.
Mahibaluan nga nag-angkon naman sang apat ka pilas sa lawas ang biktima.
Narekober naman sa crime scene ang anom ka mga basiyo sang ginaalegar kalibre .45 nga armas-luthang.
Samtang, nagapadayon sa gihapon ang ginapatigayon nga imbestigasyon sang mga kapulisan sa nagluntad nga krimen.
