ROXAS CITY – Nangin bulag kag bungol na para sa pumuluyo sang Barangay Dayao si Punong Barangay Wennie Batuampo may kaangtanan sa ila ginareklamo nga pagbinaha sa Sitio Pagutok sa nasambit nga barangay.
Sa interview sang Bombo Radyo kay Nanay Loreta Flores pumuluyo sa amu nga lugar, ginpahayag sini nga ginpalab-ot na nila ini sa talatapan sang ila barangay apang mga balabag nga sabat lamang ang ila nakuha nagikan kay PB Batuampo kag wala sang aksyon.
Suno kay Flores, anay na nga bahaon ang ila lugar apang indi kaangay sini nga nagatinir sang madugay ang tubig sa ila lugar kun sa diin dako nga huol sa ila nga mga residente.
Mahibaluan nga nagsugod lamang ang nasambit nga pagtipon sang tubig sa lugar sumugod sadtong eleksyon kun sa diin napiyerde ang pihak nga grupo rason agud ginsaraduhan ang gina-agyan sang tubig.
Bangud sini, personal nila nga gindangop sa ila amay sang barangay bangud suno kay Flores siya lamang ang may gahum nga makasolbar sini apang tubtob subong wala sa gihapon kag padayon ang ila nga pag-antos.
Ginakabalak-an lamang ni Flores ang mga kabataan nga magabalik na sa pag-eskwela bangud sigurado nga mabudlayan ang mga ini bangud lapaw na sa tuhod ang tubig sa ila lugar.
Mensahe sini sa ila Punong Barangay nga kun tani hatagan man sang pagtamud kag aksyon kag indi na paghulaton pa nga may magmasakit nga pumuluyo bangud madamo na sang mga lamok ang nagatinir sa tubig-baha ilabi na kun hapon.
