ROXAS CITY – Magapangatubang sang nagakaigo nga panumbungon ang isa sa duha ka mga nadakpan nga peke nga mga dentista sa ginpatigayon nga entrapment operation sang Criminal Investigation and Detection Group (CIDG-Capiz) sa syudad sang Roxas.
Sa interview sang Bombo Roxas kay Punong Barangay Eufrosino Azarcon sang Barangay 9 sining siyudad ginkompirmar sini nga madugay na nga naga-operate ukon nagapatigayon sang iligal nga pagpagabot sang ngipon si Floro “Boy” Gadiano 63-anyos sang amo nga lugar.
Suno kay Azarcon nga tuig 1990’s pa ini nagapanggabot sang ngipon sa ila lugar kun sa diin madamo naman ini sang mga pasyente ukon customer nga nagapagabot sang ngipon.
Aminado man si Azarcon nga nakapagabot naman ini sang ngipon sang una kay Gadiano.
Mahibaluan nga ang mga pasyente pa sini ang nagikan sa iban nga mga lugar sa siyudad kag mga kabanwahanan sa probinsya bangud bantog naman ini nga manuggabot sang ngipon sa ila lugar.
Apang, gilayon man sila nahilway matapos nga nagtakop na ang ila nga reglementary period.
Matandaan sang damlag lang nadakpan si Gadiano kag Ma. Ernestina Villaron 27 anyos tumandok sang Barangay Jolongajog, Pontevedra, Capiz apang temporaryo nga nagatinir sa Brgy. Tanque sining syudad sa iligal nga transaksyon kapareho sang paggabot sang ngipon kag pagpatakod sang braces.
