ROXAS CITY – Nagapati ang Punong Barangay sang Brgy. Matinabus, Sigma, Capiz nga indi tagaila barangay ang suspek sa pagpatay sa senior citizen nga nasapwan sa ila lugar.
Ini ang ginpahayag ni Punong Barangay Edilberto Calmerin, Punong Barangay sang nasambit nga lugar sang ma-interview sang Bombo Radyo.
Suno kay PB Calmerin nga indi mahimo sang taga-Matinabus ang amo nga pagpatay bangud wala sang pamalay ang lugar nga ginluntaran sang krimen.
Suno pa diri nga posible kilala sang biktima ang suspek kag nahibaluan nga may kwarta ang senior citizen bangud nakabaligya ini sang karabaw kag magluwas sini nagapautang man ang biktima.
Dugang pa ni PB Calmerin nga posible nagbato pa ang biktima antes ini ginpatay bangud sa nakit-an nga nagakahapay nga mga pananom sa ginluntaran sang krimen.
Matandaan nga nasapwan ang lawas sang senior citizen nga yara na sa advance state of decomposition sa Barangay Matinabus sa nasambit nga banwa.
Ginkilala ang amu nga senior citizen nga si Artemio Furingan Burias, 67-anyos kag residente sang Barangay Sta. Rita, Dumalag, Capiz.
Sa imbestigasyon sang Sigma PNP, nadiskubrehan sang utod sang biktima ang lawas sini matapos nga ila ginpangita bangud pila na ka adlaw nga wala makapauli sa ila balay. Dugang pa sang mga kapulisan nga posible ginpatay ang biktima kag ginsunog ang lawas sini.
Sa karon, nagapadayon pa ang imbestigasyon sang mga otoridad agud akilala ang suspek nga yara sa likod sang amu nga krimen.
