ROXAS CITY – Nakabaton na sang ayuda ang mga pumuluyo matapos nga ginpaidalom sa lockdown ang Sitio Punta Proper, Barangay Pawa, Panay Capiz.
Ini ang ginpahayag ni Punong Barangay Edilberto Bandejas sang mainterview sang Bombo Radyo.
Suno kay Bandejas nga ginpaidalom sa lockdown ang nasambit nga Sitio sadtong Setyembre 22, alas 12:01 sang kaaganhon tubtob Oktubre 5, 2020.
Gani, wala anay ginpahanugotan ang mga residente nga magguwa sa ila tagsa ka mga panimalay rason nga nagpanagtag ini sang tunga sa sako nga bugas kag mga relief goods sa kapin 79 ka mga pumuluyo.
Aminado si Bandejas nga naatrasar ang barangay nga makapanagtag sang ayuda bangud kulang ang pondo sang barangay rason nga ginpakamaayo sini nga mangutang agud mahatag ang mga kinahanglanon sang iya mga residente.
Mahibaluan nga ginhimo ini nga tikang sang nasambit nga opisyal kasunod sang pagpositibo sang isa nila ka residente sa COVID-19.
Ginpahayag naman sini nga padayon sa gihapon ang contact tracing nga ginapatigayon sa ila barangay agud matumod ang mga nakasalamuha sang COVID-19 positive.
Apang, suno kay Bandejas nga may yara na sang 53 ka mga indibidwal nga natumod kun sa diin nakaupod sang nagpositibo sa iya ginpadulongan nga okasyon.
Mahibaluan nga ang nasambit nga residente nga nagpositibo sa amo nga sakit ang asymptomatic ukon wala sang may nabatyagan nga sintomas sang COVID-19 sa lawas.
Samtang, nagpasalig naman si Bandejas nga himuon sini ang tanan agud nga mahatag ang mga kinahanglanon sang iya mga residente.
Matandaan nga may yara sang pila ka mga residente ang nagreklamo matapos nga naatrasar ang pagpanagtag sang ayudad matapos nga ginbutang sa lockdown ang nasambitan nga Sitio.
