ROXAS CITY – Gin-ako sang punong barangay sang Barangay Sibaguan sining siyudad ang mga alegasyon sang pila ka mga residente angut sa iregularidad nga pagpanagtag sang Social Amelioration Program ukon SAP sa ila barangay.
Sa interview sang Bombo Radyo Roxas kay punong barangay Johnny Arciga, aminado ini nga nakabaton sang cash assistance ang tatlo ka asawa nanday barangay kagawad Recarte Alapa, Frelidito Alvarez kag Antonio Adam.
Apang, ginpahayag ni Arciga nga lunsay mga frontliners ang mga ini sa ila barangay rason nga nalakip ang mga ini sa listahan sang makabaton sang SAP.
Magluwas diri ginaalegar nga nakabaton man sang cash assistance ang masobra 20 ka mga soltero sa ila nga barangay.
Apang, suno kay Arciga nga wala ini sang ideya bangud ang mga barangay health workers ang nagalista sang mga pangalan sang makabaton sang nasambit nga ayuda.
Nahibaluan nga nagpalab-ot sang reklamo sa Bombo Radyo ang wala na ginhingadlan nga former barangay kagawad natuhoy sa iregularidad nga nagakahinabo sa pagpanagtag sang SAP sa ila nga barangay.
