ROXAS CITY – Nagdepensa ang punong barangay sang Barangay Lomboy, Panay, Capiz natuhoy sa ginahaboy nga mga reklamo kag alegasyon batuk sa iya may kahilabtanan sa Social Amelioration Program (SAP) sang Department of Social Welfare and Development (DSWD).
Suno kay Punong Barangay Vincent Almado, wala sang kamatuoran nga may pinilian sila sa pagtumod sang SAP beneficiaries.
Ginpahayag sini nga matuod nga may nalista sila nga residente nga may pamilya nga Overseas Filipino Workers (OFW’s) apang sa ila assessment, nakit-an nga tuman man sila nga nagakinahanglan sang bulig.
Gin-ako sini nga nagpangbuhin sila sang tag-P100 sa mga benepisyaryo apang ini ang boluntaryo lamang bangud para ini sa mga wala makabaton sang nasambit nga ayuda.
Suno sa iya sa 163 ka mga SAP beneficiaries, 125 gid lamang ang naghatag sang P100 kag nakatipon sila sang P12, 500.
Ang natipon nga kwarta suno sa iya ang ila ginhatag sa apat ka mga households nga wala makabaton sang ayuda sa idalom sang SAP bangud lunsay roster ang mga ini sang Pantawid Pamilyang Pilipino Program (4P’s) beneficiaries.
