CUARTERO, CAPIZ – Ginpa-Bombo sang isa ka senior citizen sang Barangay Maindang, Cuartero, Capiz ang ila nga punong barangay bangud sa ginaalegar pagkadula sang iya pangalan bilang benepisyaryo sang 10 ka kilo nga bugas nga ayuda sang local government unit.
Ang Punong Barangay amo si Mario Venancio.
Sa interview sang Bombo Radyo kay Robinson Fuentes, iya ginpahayag nga nagalain ang iya buot bangud daw kaangay nga mga manggaranon ukon may kwarta lang ang ginhatagan sang bugas.
Suno kay Fuentes, masubo nga pigado na ini apang wala pa makabaton sang ayuda kag ginhambalan lang siya sang punong barangay nga magreklamo bangud sabton lang niya ini.
Dugang pa sang natungdan, nagpila na siya kuntani sang Hulyo 31 sa pagpanagtag sang bugas dala ang iya ID apang ginpahibalo ini nga wala siya sa listahan.
SABAT NI KAP
Ginpaathag sang Punong Barangay sang Maindang, Cuartero, Capiz ang proseso sang pagpanghatag sang 10 ka kilo nga bugas nga ayuda sang local government unit matapos ginpa-Bombo sang isa ka senior citizen ang pagkadula sang iya pangalan bilang benepisyaryo.
Ang nagpa-Bombo amo si Robinson Fuentes, residente sang amo nga barangay.
Sa interview sang Bombo Radyo kay Punong Barangay Mario Venancio, iya ginpahayag nga may yara sang 396 household ang barangay kag 180 lang ang mahatagan.
Suno kay Venancio, Hulyo 31 sang ginpanagtag ang bugas sa mga benepisyaryo kag naghingyo ini kay Fuentes nga hulaton lang ang iya parte bangud pangitaan niya sang solusyon.
Pahayag sang punong barangay, nakuhaan niya sang bugas ang tagreklamo sang Lunes, Agosto 3, apang wala man ini sa iya nga balay.
Gin-athag ni Venancio nga wala ini nagadumot kay Fuentes kag nagpasalig nga mahimo sa gihapon nga makuha ang bugas sa barangay.
