ROXAS CITY-Ginapanindugan sang punong barangay sang Barangay Dinginan, Roxas City nga wala ini sang ihibalo angut sa pagpalusot sang iya chief tanod sa 5 sini ka mga himata nga wala nag-agi sa border checkpoint sa Barangay Damayan, Sapian gikan sa probinsiya sang Aklan.
Suno kay Punong Barangay Elizabeth Santiago nga ginkakibot sini sang nakita ang mga himata ni Romeo Distor nga nag-abot sa ila barangay apang gin-athag sini nga wala siya sang ideya nga ginsugat sila sang nasambit nga tanod.
Samtang ginkumpirmar naman ni Santiago nga ginpadulongan ini sang mga kapulisan kag katapo sang City Disaster Risk Reduction and Management Office ukon CDRRMO agud panugyanan nga ipaidalum sa strict home quarantine ang 5 ka mga indibidwal.
Ginpasalig ni Santiago nga hugot sini nga iga-monitor ang estado sang ikaayong lawas sang mga gina-quarantine nga mga indibidwal sa ila barangay.
