ROXAS CITY – Ginklaro ni Punong Barangay Rolando “Totong” Tuazon sang Barangay Lanot, nga wala sang may natabo nga tagtaganay sa ila lugar kadungan sang pagbisita sang Department of Agriculture sa ila barangay.
Sa interview sang Bombo Radyo kay Tuazon, ginpahayag sini nga tinutuyo lamang sang ahensya nga mag-survey sa mga kabataan sang farmers nga nakahibalo mag-uma sa ila lugar.
Suno kay Tuazon, sa iya pagpangusisa wala sang may gintuad ang DA nga may yara sila nga ayuda nga ihatag sa mga pumuluyo.
Ini matapos, nagdugok ang mga pumuluyo sang Barangay Lanot sa ila barangay sa pagbanta nga may yara sang grasya nga ihatag sa ila.
Ginpahayag man sang Punong Barangay nga sa iya pagbulubanta 64 lamang ang nadala sa listahan bangud sila lang ang qualified sa ginapangita sang ahensya kag matuod nga naga-uma ukon may gina-umhan nga duta.
Mahibaluan, may yara sang masobra 200,000 nga mga mangunguma ang probinsya sang Capiz.
Mensahe ni Tuazon sa pumuluyo, pananglitan nga may yara sang mga ayuda nga ginatan-ay sa ila barangay indi niya ini pagtaguon sa pumuluyo, kag likawan na lang kun tani ang pagpalapta sang mga indi matuod nga balita kun sa diin nagaresulta sang indi pag-intindihanay sang tanan.
