ROXAS CITY – Padayun nga ginabulong sa ospital ang duha sa 15 ka mga caretaker sang isa ka punong sa Barangay Agbanog, Pontevedra, Capiz, matapos ginkastigo sang napakilala nga mga katapu sang Revolutionary Proletarian Army- Alex Boncayao Brigade (RPA-ABB) nga nagsalakay sa punong.
Sa exclusive interview sang Bombo Radyo Roxas kay Sr. Inspector Marvin Balmes, hepe sang Pontevedra Municipal Police Station, ginpahayag sini nga nagaguwa sa imbestigasyon nga pinpaarakan sang luthang sang napulo ka armado nga mga kalalakinhan nga nagpakilala nga katapu sang RPA-ABB ang punong nga ginapanag-iyahan ni SB member David Bauson sang Panit-an, Capiz.
Sa kakibot sang mga nagabantay sa punong, nagdalagan sila kag nagpanago agud malikawan ang pat-ud nga katalagman.
Apang duha sa 15 ka bantay sa punong nga sanday Jose Renato Baranco kag Inocencio Moquete ang ginkastigo kag ginpahog nga magbiya na sa lugar para indi mabutang sa peligro ang kabuhi.
Samtang, narekober sang mga pulis sa ila nga pagresponde ang 23 ka empty shells sang .9mm, .45 caliber pistol, M16 armalite rifle kag isa ka live ammo kag nabilin sang mga suspek ang 3 ka mga sweatshirt nga may imprenta nga RPA-ABB.
