Gin-absuwelto sang Manila Regional Trial Court si Pura Luka Vega o Amadeus Fernando Pagente sa tunay nga kabuhi may kaangtanan sa kaso nga ginpamatbat sa iya bangud sa nag viral nya nga drag performance nga “Ama Namin” samtang nakasuksok sang mga panapton nga kaangay kay Kristo.
Base sa nangin desisyon sang Korte nga may petsa nga Hunyo 10, ginsiling sang Branch 184 sang Manila Regional Trial Court sa pagpanguna ni Judge Czarina Samonte-Villanueva nga wala napamatud-an sang prosekusyon ang pagkasala ni Luka “beyond reasonable doubt,” rason nga gin-absuwelto ini sa kaso sa paglapas sa Article 201 sang Revised Penal Code kag Cybercrime Prevention Act of 2012 (RA 10175).
Kadungan sini, ginmando man sang korte ang paghatag sa P72,000 nga sa madumduman pinyansa ni Luka para sa temporaryo sini nga kahilwayan.
Wala man napunggan sang drag performer nga magpasalamat sa iya nga social media sa desisyon sang korte kag ginsiling nga isa nalang ka kaso ang nabilin.
Apisar nga gin-absuwelto, ginpahanumduman sa gihapon sang korte si Luka nga mangin mahalungon sa mga ginapanghimo nga mga mga performance ilabi na kag malapad ang gakalab-otan sang social media.
Madumduman nga sang Hulyo 2023, nag-file sang reklamo ang grupo nga Hijos del Nazareno batuk sa iya bangod sa nasambit nga performance nga gintawag nila nga “pag-atake sa pananampalataya.” Gin-aresto si Luka sang Oktubre 2023 kag gindeklarar nga ‘persona non grata’ sa pila ka mga probinsya sa pungsod.
Madumduman man nga nagkaara pa sang fundraising para kay Luka sang mga kaangay sini drag artists kag supporters kun sa diin nakatipon ini sila sang kapin P900,000 para pang piyansa kag para sa galastusan ni Luka.
