ROXAS CITY CAPIZ – Dakop ang isa ka Person With Disability (PWD), matapos ginapahayag nagpangawat sa isa ka subdivision sa Barangay Lawaan, Roxas City.
Sa impormasyon nga nakuha sang Bombo Radyo nagikan sa Roxas City PNP, ginkilala ang nadakpan nga isa ka menor de edad nga lalaki, kag residente sang Sitio Pagutok, Barangay Milibili, sining syudad.
Suno sa otoridad nga base sa pahayag ni Dante Danid, 53-anyos, kag security guard sa amu nga subdivision nga samtang siya ang naga-roving pag-abot sa atubang sang stock house nakit-an sini nga may yara sang naga-parking nga motorsiklo kag may yara sang isa ka lalaki nga nagatindog.
Dugang pa ni Danid nga matapos siya nakita gilayon nga ginsenyasan sang suspek ang iya kaupod nga yara sa sulod sang stock house kag madasig nga nagsakay sa motorsiklo agud magpalagyo.
Samtang ang kaupod nila sini nga PWD ang nabilin kag natigayon nga madakpan sang nasambit nga security guard nga may yara sang dala nga mga nanari-sari nga kabilya.
Sa karun yara na ini sa paghinakop sang Roxas City PNP para sa nagakaigo nga disposisyon.
