ROXAS CITY – Desidido ang 21-anyos nga Person With Disability (PWD) nga pasakaan sang nagakaigo nga panumbungon ang anay employer kag manunudlo sa Plaridel West Elementary School bangud sa pagsabunot, pagbunggo sang iya ulo sa pirtahan, pagdamhag kag pagpakahuya sa iya sa madamo sang tawo sa nasambit nga eskwelahan.
Ginpahayag ni Alyas April sang Barangay Tiza, Roxas City nga ginkakibot sini ang nangin aktwasyon ni Mrs. Cheryl Alovera sang makita ang iya presensiya sa sulod sang eskwelahan.
Wala naglaum ang tagreklamo nga kasunod sa pagtawag kag pagpalapit sini kay Alovera ang pagpadapat sa iya sang kamot kag pagpaluhod nga kasubong nakahimo ini sang sala.
Suno kay April nga madamo sang mga tawo ang nakakita sa ginhimo sa iya ni Alovera bangud natabuan nga may klase pa sang natabo ang insedente.
Ginpahayag sang tagreklamo nga amo na lamang ang kaakig sa iya ni Alovera bangud nagapati ang manunudlo nga siya ang nagapalapta sang istorya angut sa pag-angkon sini sang relasyon sa isa man ka manunudlo.
Aminado ini nga madamo gid man ini sang nahibaluan nga sekreto ni Alovera, apang wala ini nagpanugid sa iban.
Indi man siya ang dapat basulon ni Alovera kun nahibaluan sang iban ang iya relasyon bangud hayag na ini sa eskwelahan.
Nahibaluan nga nagtrabaho sa sulod sang duha ka tuig si April bilang caregiver sa iloy ni Alovera kag naghalin lamang sang nakakita na sang ginbulos sa iya.
Gintuad sini nga ginahatagan lamang ini sang P100-200 depende kun may kuwarta ang manunudlo.
Apang wala nagsunod ang manunudlo sa ila ginkasugtan nga pagaswelduhan siya sang P6,000.
Ginkwestyon man sang tagreklamo ang wala pagkadto sa police station ni Alovera nga nag-akto nga kasubong naglain ang pamatyag sa diin kahigayunan na kuntani ini agud mag-atubangay sila.
