ROXAS CITY – Ginapahalin na sang Chief of Hospital sang Roxas Memorial Provincial Hospital (RMPH) ang isa ka pasyente nga may yara sang balatian nga stage 4 breast cancer kag tiayon sang isa ka Person with Disability (PWD).
Sa interview sang Bombo Radyo Roxas kay Eddy Sarad 55-anyos nga ginaalegar sini nga ginapapuli na ni Dra. Edmarie Magallanes Tormon ang iya tiayon nga si Gloria Pacarya Sarad 53-anyos nga madugay na nagasuprehir sang balatian nga stage 4 cancer.
Apang, wala nagpasugot si Sarad sa nangin pahayag sang nasambit nga doktor bangud sa baylo nga mag-ayo pa ang iya tiayon may posibilidad nga maglala pa sini ang iya kondisyon.
Magluwas diri, suno kay Sarad nga gintuad pa sa iya sang nasambit nga doktor nga may yara sang ginaalegar nga pasyente nga nagpositibo sa Coronavirus Disease (COVID19) sa amo nga ospital rason nga ginapapuli na sila agud indi malatnan sang nasambit nga balatian.
Nagapati naman si Sarad nga indi ini matuod kag rason lamang ini sang nasambit nga doktor agud magpasugot ini nga papulion ang iya tiayon.
Nahibaluan nga isa ang iya tiayon sa mga pasyente nga naka-avail sang libre nga dialysis sa Malasakit Center sang amo nga ospital.
Matandaan nga ginkasal ang mag-asawa sadtong Pebrero 24, 2020 nga ginhiwat mismo sa amo nga ospital kun sa diin nagserbi pa nga maninoy ang mga personnel sang Bombo Radyo kalakip na ang mga nurses kag doktor sa nasambit nga ospital.
