ROXAS CITY – Wala na sang kabuhi sang nasapwan sa sulod sang CR sa iya puluy-an ang isa ka senior citizen nga person with disability sa Barangay Baybay, sining syudad.
Ginkilala ang biktima nga si Jose Valencia 66-anyos sang nasambit nga lugar.
Ginpahayag ni Barangay Kapitan Reynaldo Magallanes nga nakita ni Marlon Bustillo ang biktima nga nagasobsob sa semento sang CR.
Katapusan nga nakita nga buhi ang biktima kahapon sang nagbakal ini sa tindahan.
Suno naman kay Bustillo nga nagpadulong ini sa balay ni Valencia para magbakal sang lubi apang ginkatingala nga wala nagasabat ang biktima sa iya pagpanawag rason nga nagsulod na lamang ini.
Apang ginkakibot sini sang nakita ang biktima sa sulod sang CR kag nakasobsob na ang nawong sa semento.
Wala sang anuman nga panapot sa lawas si Valencia bangud ginapatihan nga nagapamuhin ini.
Samtang ginpahayag ni Police Master Sergeant Ronnie Recto, imbestigador sang Roxas City PNP nga posible duha na ka adlaw nga patay ang biktima, bangud yara na ini sa advanced state of decomposition.
Ginapatihan nga wala sang foul play sa kamatayon sang biktima bangud kilala ini nga maayo nga tawo nga wala sang kaaway sa ila nga lugar.
