ROXAS CITY – Otomatiko na nga cover ang isa ka Person With Disability (PWD) sa Philippine Health Insurance ukon PhilHealth.
Ini ang ginkumpirmar ni Mrs. Mary Jane Amigo, social insurance kag Public Information Officer sang PhilHealth Capiz, sang mainterview sang Bombo Radyo.
Suno kay Amigo, kinahanglan nga sulod PWD ID holder sa Philippine Registry PWD – isa ka sistema sang DOH kun sa diin makita ang pangalan sang mga PWD’s nga may ID.
Bangud sa layi nga RA 11228 ukon “the act providing for mandatory coverage of Person’s with disability (PWD)” wala na sang pagabayaran nga premium ang member kag sa tion nga maospital ini, mahimo nga matsekyar sa system sang PhilHealth para sa assistance, kun wala, gina-refer sang mga ini sa DSWD para sa financial assistance.
Sa mga employed PWD’s mapapubliko man ukon pribado, sa karon nga tuig, nagapadayon ang ila nga pagbayad pinaagi sa pagkaltas sang ila employer sa ila suweldo bangud wala pa sila madala sa General Appropriations Act (GAA), apang sa tion nga madala na sa GAA ang mga employed PWD members, posible sa 2023, indi na nila kinahanglan nga kaltasan sang PhilHealth bangud pagatungaon na ini bayad sang gobyerno kag ila employer.
Dugang pa ni Amigo sa mga nagapati nga kabahin sila sang PWD’s, yari ang pila sa talamdan kag mahimo magpadulong sa MSWD/DSWD para sa dugang nga impormasyon:
Physical disability (amputation, post-polio, etc.)
Sensory disability (bulag, bungol, etc.)
Intellectual, Psycho-social and Psychiatric disability (Depression, bipolar, etc.)
Learning disability (autism ukon may ADHD)
Cancer patients kag may rare diseases
Sa karon 30% na ang nakasulod sa system sang PRPWD.
Panugyan ni Amigo, sa mga nag-expire nga PWD ID dapat nga makapa-update ang ang mga ini sa ila MSWDO ukon sa DSWD, agud otomatiko nga makaangkon sang nasambit nga benepisyo sa PhilHealth.
