QATAR – Nagpahanumdom ang Qatari Officials sa mga pumuluyo nga likawan ang pagpalapit sa military airbases sa pungsod Qatar.
Ini matapos ang paglunsyar sang missiles kag drone attacks sang pungsod Israel kag US batok sa Iran.
Tinutuyo sang nasambit nga aktibidad amo ang kakson kag islan ang regime sang pungsod Iran.
Suno kay Bombo Joseph Timothy Rivera, International Correspondent direkta sa Qatar, iya ginpahayag nga asud-asud nga pagsigabong sang kalangitan ang nabatyagan sa lugar nga naghatag sang kakugmat.
Pahayag pa niya, naga-uyog ang mga imprastraktura sa tuman nga impact sang mga missiles nga ginalunsyar sang magkatuhay nga pungsod.
Nahibaluan nga yara sa Al Udeid ang pinakadaku nga military airbase sang Estados Unidos rason nga gintarget ini sang pungsod Iran.
Dugang pa niya, hugot nga ginadumilian ang masami nga paggwa sa mga puluy-an ilabi na sa mga malapit sa military airbases agud makalikaw sa ano man nga sahi sang insidente nga mahimo makautas sang kabuhi.
Ginpasiguro man sang natungdan sa ila mga himata sa Pilipinas nga yara sila sa maayo nga kahimtangan apisar sang nagapadayon nga tensyon sa pungsod Israel kag Iran.
INTERVIEWED BY: BOMBO ROADNIE DALANON
