Ginbasura sang Quad Committee ang motion to quash ukon apela ni anay Presidential Spokesperson Atty. Harry Roque batuk sa mandato nga magsumite ini sang mga dokumento may kaangtanan sa operasyon sang Philippine Offshore Gaming Operators ukon POGO.
Kalakip sa mga dokumento nga ginapasumite sang quad committee kay Roque ang business records, tax returns kag mga Statements of Assets, Liabilities and Net Worth (SALNs).
Sa ginpatigayon nga pagsinapol sang quad committee, nagpromisa si Roque nga isumite ang natuad nga mga dokumento apang nagbag-o ini sang desisyon sa baylo nga nagplastar sang motion to quash the subpoena.
Suno kay Roque, ang nasambit nga mga dokumento wala sang kahilabtani sa imbestigasyon sang Quad Committee kag paglapas sa iya kinamatarong nga maghipos kag proteksyunan ang kaugalingon.
Pahayag ni Batangas 2nd District Rep. Gerville “Jinky Bitrics” Luistro, importante ang nasambit nga mga dokumento nagikan kay Roque nga ginapahayag may koneksyon sa Lucky South 99, ang iligal nga POGO firm sa Porac, Pampanga nga ginsalakay sang mga awtoridad.
