Hinyuon sang House Quad Comm sa anay opisyal sang Palasyo nga si Irmina “Muking” Espino nga isaysay ang iya nangin papel sa reward system sa drug war sang anay administrasyon.
Mahibaluan nga nagpaandam si Quad Comm co-chair Santa Rosa City Rep Dan Fernandez kay Espino nga maga-atubang ini sa contempt kung indi ini magtambong sa pagsinapol sang Komite nga nakatalana sa Nobyembre 6,2024.
Kumpiyansa naman si Fernandez nga magatambong sa pagsinapol sang Quad Comm ang anay aide sang Palasyo.
Si Espino ang ginatumod ni anay Philippine Charity Sweepstakes Office (PCSO) General Manager Royina Garma bilang staff ni Sen. Christopher “Bong” Go, nga gina-akusahan nga naga-manage sang cash rewards nga ginahatag sa mga police officers nga nakapatay sang drug suspeks.
Samtang, nagtambong si Espino sa Senado sadtong Lunes kag ginpanginwala nga siya ang nagserbi bilang disbursing officer sa operasyon sang pondo sa drug war sang Duterte administration.
