Hugot ang pagpati sang House Quad Committee sa mandato sang Pasig City Regional Trial Court (RTC) Branch 167 nga isaylo sa Pasig City Jail si anay Bamban, Tarlac Mayor Alice Guo may kaangtanan sa kaso sini nga qualified human trafficking.
Suno kay House Committee on Public Order and Safety Chairman kag Sta. Rosa, Laguna Representative Dan Fernandez, ang nasambit nga mando sang Pasig RTC ang nagasanto sa ila tinutuyo nga kuhaon sa Philippine National Police (PNP) custodial center si Guo agud malikawan nga mahatagan ini sang espesyal nga pagtrato.
Matandaan nga sa ika-anum nga pagsinapol sang Quad Committee may kaangtanan sa iligal nga operasyon sang Philippine Offshore Gaming Operators ukon POGO ginpamatbatan nga contempt si Guo bangud sa paglantaw sang mga kongresista nagabinutig ang mga ini.
Kadungan sang contempt, nagsulat man ang Quad Committee sa Valenzuela RTC nga siya ang may hawid sang graft case ni Guo kag ginhinyo nga masaylo ini sa detention facility sang Kamara.
Apang suno kay Fernandez, bangud yara sa regular nga presohan si Guo posible nga indi na pag-idayon sang Quad Committee ang paghinyo sa kustodiya sini.
