ROXAS CITY – Preparado na ang Hortus-Botanicus sa Barangay Milibili nga amo ang magaserbi nga quarantine facility para sa magaabot nga mga Capizeño Overseas Filipino Workers (OFW’s) nga residente sang Roxas City gikan sa Metro Manila.
Ini ang kasunod sang ginpatigayon nga inspeksiyon nga ginpangunahan mismo ni City Mayor Ronnie Dadivas.
Sa exclusive interview sang Bombo Radyo, ginpahayag sang alkalde nga preparado na ang amo nga pasilidad para sa 14-day quarantine period sang nasambit nga mga OFW’s.
Suno diri nga sarang makaakomodar sang kapin 40 ka mga indibidwal ang amo nga pasilidad kag plano pa nga dugangan ang isolation area sa nasambit nga pasilidad.
Paga-abagahon man sang gobyerno sang siyudad ang kagastuhanan sa pagkaon sang mga ini kun sa diin pagaserbihan sila sang pamahaw, panyaga, panyapon kag snacks sang makaduha ka beses sa isa ka adlaw.
May pagasundon man nga mga general house rules kun sa diin pagadumilian ang pagbisita sa ila sang ila mga himata agud malikawan ang close-contact apang mahimo man sila madul-ungan sang mga pagkaon.
Mahibaluan nga mas o menus 200 ka mga OFW’s ang ginalauman nga magapauli sa probinsiya kun sa diin ang mga taga-Roxas City ang magatenir sa nasambit nga pasilidad samtang ang iban naman ang magatenir sa iga-designar nga quarantine facility sa ila tagsa ka mga banwa nga pagapulian.
