ROXAS CITY – Ginaprepahan na sa karon sang lokal nga gobyerno sang siyudad sang Roxas ang pagpauli sang mga stranded Overseas Filipino Workers gikan sa Cebu City kag Metro Manila.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo Roxas.
Suno sa alkalde, nakahanda na ang quarantine ukon isolation facility sang siyudad sa Barangay Milibili para sa mga returning OFW’s nga mga residente sang siyudad sang Roxas.
Nagalab-ot sa 40 indibidwal ang mahimo maakomodar sa nasambit nga pasilidad base sa standards sang Department of Health (DOH) kag COVID-19 Inter-Agency Task Force.
Pagatutukan suno diri sang City Health Office ang nasambit nga mga indibidwal sa ila nga 14-day quarantine period.
Sa halos 200 ka mga returning OFW’s, indi pa mapat-od sang alkalde kun pila sa mga ini ang residente sang siyudad sang Roxas.
Samtang ginpahayag sang alkalde nga nakahanda ang gobyerno sang siyudad sa mangin desisyon sang COVID-19 Inter-Agency Task Force sa pagtakop sang Enhanced Community (ECQ) sa Abril 30.
Suno diri nga magasunod lamang ang gobyerno sang siyudad sang Roxas sa rekomendasyon kun dalayon nga i-lift ang ECQ ukon i-downgrade sa General Community Quarantine.
