ROXAS CITY – Istrikto nga mga quarantine protocols ang ginapatuman sa Zambia, Africa para masiguro nga indi na magtaas pa ang numero sang mga nagakalamatay sa pungsod bangud sa coronavirus disease 2019.
Sa report ni Bombo International Correspondent Rommel Mesina, nagatrabaho sa isa ka construction site sa Zambia, Africa, ginpahayag sini nga ginapaidalum sila sa 14 day quarantine sa diin nagapadala sang mga doktor kag nurses ang Ministry of Health para matsekyar sang maayo ang ila ikaayong lawas.
Ginkumpirma pa ni Mesina nga bangud sa lockdown ang kampo sa diin sila nagatrabaho kag nagatenir, indi sila mahimo nga makaguwa.
Hugot man nga ginapatuman ang social distancing sa diin kinahanglan nga may distansiya sila sa isa kag isa kun yara na sa trabaho.
Wala man sang nagabiyahe nga mga bus kasunod sang pagpatuman sang lockdown.
Wala sang problema pag-abot sa ila nga sweldo, bangud mismo ang kompaniya ang nagpadala sa ila pamilya sang 80% sang ila nga sweldo sa diin 20% na lamang ang nabilin sa ila.
Samtang wala naman sang ma-reklamo si Mesina sa ila nga kompaniya bangud well provided sila nga mga trabahador sa ila kinahanglanon humalin sa pagkaon tobtob sa ila ginateniran sa sulod sang kampo.
Sa karon may tatlo ka na-record nga napatay sa COVID-19 sa pungsod, 75 ang nalatnan kag 35 ang naka-recover sa nasambit nga sakit.
