ROXAS CITY – Ginpanginwala sang presidente sang Capiz Sand and Gravel Association Inc. nga may yara sang ginpanghatagan sang permit ang anay nagapungko nga administrasyon apisar wala naka-comply sang nagakaigo nga rekisitos agud maka-operate sang quarry sa bug-os nga probinsya sang Capiz.
Sa interview sang Bombo Radyo kay Victoria Olmedo, quarry owner, suno diri impossible nga matabo nga makakuha sang permit ang mga operator kag indi maghikot sang mga rekisitos bangud tuman ka strikto ang Capiz Provincial Environment and Natural Resources Office – CaPENRO ilabi na sa mga ginapatuman nga layi.
Aminado ini nga may nahibaluan ini nga nagapatigayon sang operasyon apisar wala sang permit kag indi ini patas sa ila bahin bangud nagakabudlay sila nga magcomply sa mga rekisitos para lamang legal nga maka-operate.
Suno kay Olmedo, antes maghatag sang permit ang CAPENRO ginapahibalo sila kun ano ang nagakadapat himuon agud makapasar sa ila nga pagsulundan kaangay sang pagpananum kag pagpahamtang sang basurahan.
Kun matigayon naman nga makakuha sang permit, obligado ang mga operator magpasa sang kada bulan nga sales report, magbayad sang excise tax kag may ginasunod nga volume sa sulod snag isa ka tuig.
Samtang, pahayag sini nga nabuhi-an man ini sang paglaum sa posibilidad nga pagakakason man ang suspencion sa quarry operations.
Mahibaluan nga tubtob sa karon padayon ang monitoring sang mga otoridad sa nasambit nga operasyon.
