Plano sang Simbahan sang Quiapo nga magpatigayon sang maid-id nga pagtuon para sa posible nga mga pagbag-o sa float, crowd management, kag ruta sang Traslacion pagkatapos sang halos 31 ka oras nga prusisyon sang kapiestahan sang Poong Jesus Nazareno subong nga taon.
Suno kay Quiapo Church vicar Rev. Robert Arellano, may yara sang assessment agud mahibaluan kun ano ang kinahanglan nga bag-uhon para sa palaabuton nga mga selebrasyon, lakip na ang Nazareno 2027.
Apisar nga temprano pa suno sa iya ang paghimo sang desisyon, ginsambit ni Arellano nga posible nga bag-uhon ang andas ukon ang karosa nga may dala nga imahe sang Nazareno, subong man ang crowd management system.
Dugang pa sini nga dapat wala sang deboto nga yara sa atubang sang imahe agud indi maatrasar ang pag-uswag sang prusisyon.
Nahanungod sa ruta sang Traslacion, ginpahayag ni Arellano nga ginatun-an ini kada tuig, apang ang pagbag-o sini isa ka “daku nga desisyon” nga dapat basehan ang datos.
Sini nga tuig narekord ang pinakamalawig nga Traslacion sa kasaysayan, nga naglawig sang 30 ka oras, 50 minutos, kag isa ka segundo — nga naglabaw sa rekord sang Nazareno sang 2007 nga nagsobra sa 24-oras.
Dugang pa, may kabug-usan nga 9,640,290 ka mga deboto ang nagpasakop sa 10 ka adlaw nga selebrasyon halin Disyembre 31 tubtob Enero 10, ang pinakamataas nga numero nga narekord sang Quiapo Church.
Ginpahayag ni Arellano nga mga 5.5 milyon ang nagtambong mismo sa Traslacion, samtang ang nabilin ang nagtambong sa mga misa, novena, Misa Mayor, kag aktibidades sa Quirino Grandstand.
Gin-ako man sang pari nga ang kadamuon sang mga deboto ang nagapanguna nga rason sa pagdugay sang prusisyon.
Ginkumpirmar man ni Arellano nga apat ang napatay sa tunga sang selebrasyon. Tatlo diri ang mga deboto nga nagapasakop sa Traslacion, samtang ang ika-apat amo ang photojournalist nga si Itoh Son, 55 anyos, nga nasapwan nga wala na sang kabuhi samtang naga-cover sang Nazareno festival.
