Ginpahayag sang Department of the Interior and Local Government (DILG) nga ang mga pribado nga eskwelahan ang mangin responsable sa hugot nga pag-monitor sa mga nagasulod sa ila pasilidad agud gilayon nga madakop ang mga nagadala sang armas.
Suno kay DILG Secretary Jonvic Remulla, sa mga pampubliko nga eskwelahan, ipalapta nila ang mga barangay tanod agud magpatuman sang mandatory nga pag-check sa mga bag sang mga estudyante.
Tinutuyo sang sini nga tikang nga malikawan ang pagbalik sang mga krimen nga natabo sa sulod sang mga eskwelahan.
Dugang pa ni Remulla, nagaplano sila upod sa Philippine National Police (PNP) nga magporma sang Quick Reaction Force nga gilayon nga magaresponde sa amu nga mga insidente ukon problema.
Ginpahibalo liwat ni Remulla ang importansya sang hugot nga gun control sa pungsod. Suno sa iya, dapat ihatag ang mga penalidad batuk sa mga nagapabaya sa ila mga service firearms agud malikawan nga magamit ini sa mga krimen.
