Emosyonal nga nagpahayag ang anay Miss Grand International 2024 nga si Rachel Gupta sang rason sa likod sang iya pagbiya bilang titleholder.
Sa iya halos isa ka oras nga video nga ginpaguwa online pagkatapos mag-resign sa MGI sang Miyerkules, ginsaysay ni Rachel ang iya naagyan sa nagligad nga 7 ka bulan bilang MGI queen halin sang nagdaug sia sang Oktubre 25, 2024.
Gindumdom sini nga humalin sang iya kadalag-an, wala niya nabaton ang nagakaigo nga pagtratar nga ginsaad sa iya bilang reigning queen, kasubong sang indi paghatag sang basic amenities. Kabaliskaran sa ginpromisa sa iya “penthouse,” nagsiling sia nga ginpapuyo sia sa isa ka gamay nga kuwarto sa hotel sa sulod sang kapin sa isa ka bulan kag dayon ginsaylo sa isa ka “dilapidated house”isa ka oras ukon kapin pa ang kalayuon gikan sa sentro sang siudad, gikan sa MGI Hall sa Thailand, kag nagsiling sia nga wala man sia ginhatagan sang salakyan.
Ginpahayag man sini nga wala matuman ang promisa niya nga magbiyahe sa masobra 20 ka pungsod.
Ginsiling man niya nga wala sia ginhatagan sang pagkaon kag mga kinahanglanon sang organisasyon, kag sa tagsa ka tion nga magtinguha sia nga istoryahon ang organisasyon nahanungod sa iya kahimtangan, ginapahog sia nga pahalinon sa trono kag pang-blackmail.
Indi man mapunggan ni Rachel nga tawgon ang mga organisador sang MGI nga mga negosyante nga wala sang tagipusuon nga nagaulikid lamang sa pagpangita sang kuwarta.
Gin-athag ni Rachel nga ginhimo niya ang video indi lamang agud ipaambit ang iya istorya kundi agud mabuligan ang iban pa nga mga kababainhan sa bug-os nga kalibutan nga nagadamgo nga mag-intra sa amo nga kompetisyon agud nga matun-an nila ang kamatuoran nahanungod sa organisasyon kag malikawan ang pareho nga kapalaran nga iya na-eksperyensyahan.
Sa katapusan, ang Indian beauty queen nagsiling nga magapadayon sia sa pagpati sa iya kaugalingon kag nagpasalamat man sa publiko sa ila suporta, gugma, kag pagsalig sa iya. Sa pagbalik sang korona, ginpahayag ni Rachel nga wala sang may nadula sa iya, kundi nagbatyag sia sang kahilwayan sa una nga tion sa sulod sang mga binulan. Ginpahayag man sini nga makaginhawa na siya kag nagbalik na ang iya kabuhi, rason nga iya gid ginapasalamatan
