Ginpabaskog sang Regional Anti-Cybercrime Unit 6 ang kampanya batok sa bullying kag cyberbullying agud maprotektahan ang kabataan sa online world.
Ini kasunod sang nagluntad nga shooting incident sa isa ka pampubliko nga eskwelahan sa Tacloban City nga ginapahayag posible may kaangtanan sa bullying.
Sa interview sang Bombo Radyo kay Police Captain Froilan Domile sang Regional Anti-Cybercrime Unit 6, iya ginpahayag nga masami nagaumpisa ang cyberbullying sa mga group chat kag mga post sa social media kag iban pa nga online platforms.
Suno kay Domile, agud malikawan ang cyberbullying, indi dapat magpakig-angot ukon mag-entertain sang mga indi kilala sa online.
Ginpahanumdom man sini ang mga kabataan kag ginikanan nga maghalong sa paggamit sang social media kag magreport gilayon sa mga otoridad ukon sa eskwelahan kon may insidente sang bullying ukon cyberbullying.
Dugang pa sang natungdan nga importante ang kooperasyon sang mga ginikanan, eskwelahan kag komunidad agud matapna ang bullying kag masiguro ang seguridad sang mga kabataan.
