ROXAS CITY –Nagapadayon ang massive random testing sa Bahrain bilang lihok sang gobyerno kontra coronavirus disease (COVID-19) pandemic.
Ini ang base sa report sa Bombo Radyo ni Bombo International Correspondent Michelle Anne Oducado.
Suno diri nga nagasaka ang kaso sang nasambit nga balatian sa pungsod bangud nagapadayon sa gihapon ang random testing sa magkatuhay nga mga testing centers sa pungsod.
Ginpahayag sini nga may ginpahamtang man nga hotline number ang gobyerno nga mahimo matawgan sang mga residente agud makapaidalom ang mga ini sa laboratory tests.
Sa pihak nga wala sang curfew kag lockdown sa pungsod, may pipila ka mga kompaniya nga nagapatuman sang work-from-home scheme sa ila mga empleyado kag may mga non-essential establishments naman nga dalayon nga nagsarado.
Gindugang pa sini nga temporaryo man nga ginapalikaw ang pagpatigayon sang mga Ramadan-related activities sa Middle East agud malikawan ang pagdugok sang mga tawo.
Partikular nga ginahimo sang mga tawo sa lugar agud makalikaw sa nasambit nga balatian amo ang pagsunod sa abiso sang mga otoridad, pagsuksok sang face mask kag pag-obserbar sang social distancing.
