ROXAS CITY – Ginkumpirma sang head sang City Disaster Risk Reduction and Management Office nga yara na karon sa quarantine facility sa hortus botanicus sa Barangay Milibili ang duha ka empleyado sang syudad nga nagpositibo sa COVID-19.
Suno kay Mr. Dennis ‘’Pong’’ Saneo nga lunsay asymptomatic ang duha ka nagpositibo sa COVID-19 nga empleyado sang General Services Office (GSO) kag Tricycle Franchising and Regulatory Unit (TFRU) kag maayo man ang ila nga kondisyon.
Padayon man ang monitoring sa ila sang mga medical workers nga nagatenir sa lugar.
Malipayon man nga ginpahayag ni Saneo nga negatibo ang resulta sang swab test sa mga high risk contact nga may close contact sa mga nagpositibo sa COVID-19.//
Nahibaluan nga ginmandu ni Mayor Ronnie Dadivas nga agud masiguro nga indi maglapta ang coronavirus disease magapatigayon sang random swab testing sa mga talatapan sa city hall, labi na sa mga talatapan nga malapit sa area nga may nagpositibo nga empleyado sang COVOD-18 kag mga opisina nga madamo sang nagakadto nga tawo.
Posible nga suguran ang swab test subong nga adlaw kun matapos na ang listahanay sa mga pangalan sang empleyado.
