Roxas City – Balik-presuhan ang isa ka rape convict matapos nagpanghimulos sang 16-anyos nga menor de-edad sa banwa sang Sapian, Capiz.
Ginkilala ang suspek nga si Joel Garcia 31-anyos sang nasambit nga banwa.
Natabo ang una nga insidente sang tuig 2008 sa diin nagapang-edaron sang walo ka tuig ang una nga biktima.
Nasentensiyahan si Garcia nga guilty sa kaso nga rape kag ginbilanggo sa New Bilibid Prison sa Muntinlipa City.
Matapos ang walo ka tuig nga pagserbe sang iya sentensiya nakaguwa ini pinaagi sa Good Conduct Time Allowance (GCTA).
Sa pagbalik ni Garcia sa probinsiya sang Capiz nakakita ini sang trabaho, apang ginaalegar nga nagpanghimulos sang isa naman ka 16-anyos nga dalagita nga nakilala sini sa binaylihan.
Nagkaisog ang pamilya sang ikaduha nga biktima nga magpasaka sang kaso nga rape agud mahatagan sang hustisya ang nadangatan sang dalagita sa kamot sang rape convict.
Sa karon nakunong na sa karsel sang BJMP Mambusao District Jail si Garcia.
