ROXAS CITY – Indi pa makahatag sang komento ang presidente sang Roxas City Tricycle Operators and Driver’s Association (RC TODA) angut sa kontrobersiyal nga emergency loan nga pamaagi sang gobyerno sang syudad agud mabuligan ang mga tricycle drivers kag operators nga apektado sang pandemya kag Libre Skay program sang LTFRB.
Ginpahayag ni Mr. Wilson Devela nga kinahanglan ma-presentar sang representante sang Hublag Capiznon sang Gerry Roxas Foundation ang proseso sang pagbayranay agud mahibaluan sang mga tricycle drivers kag operators ang mode of payment sang paga-utangon nga P10,000.
Apang pananglitan nga gamiton nga collateral ang frankisa sang tricycle agud maka-loan sa lending company, opinyon ni Devela nga indi siya magpasugot.
Suno kay Devela nga mabutang sa alang alang kag pierdido ang operator nga halinan sang iya driver pananglitan nga gamiton nga collateral ang frankisa, bangud sila nga operators ang magabayad sa nabilin nga kautangan sang driver.
Importante man nga mahibaluan ang bahin sang mga tricycle drivers kag operators kun pabor ukon indi sila sa termino sang pagbayranay.
Apang ginpasalamatan ni Devela si Mayor Ronnie Dadivas sa ginhimo sini nga inisyatibo agud mabuligan ang mga transport sector labi na ang mga tricycle drivers kag operators.
Ginkumpirma man ni Devela nga nakabaton ini sang imbitasyon sa patigayunon nga
Committee hearing sang Committee on Rules sa pagpanguna ni City Councilor Paul Ivan Baticados buwas nga adlaw.
Apang ginkatingala lamang ni Devela ang tinaga nga observer sa imbitasyon sa diin sa iya paghangup nga ayhan mangin observer lamang sila kag indi pagpahanugutan nga makapamangkot.
