Nagapawagan sang suporta ang mga kapulisan sa programa nga “CAPeace–Tawayhan” agud mapadayon ang kalinong kag seguridad sa Probinsya sang Capiz.
Sa interview sang Bombo Radyo kay Police Lieutenant Colonel Rogelio Tomagtang Jr., Chief of Police sang Roxas Component City Police Station, iya ginpahayag nga isa sa prayoridad sang programa amo ang “Balik-Loob and Surrender of Loose Firearms Assistance Desk.”
Suno kay Tomagtang, paagi sa amo nga programa, makasurrender ang mga persona sang ila loose firearms sa ila barangay, nga gilayon naman nga ginakoordinar sa police station nga may hurisdiksyon sa amo nga lugar.
Dugang pa sang natungdan, ang amo inisyatibo may tinutuyo nga mapabaskog ang pagbinuligay sang PNP, mga local government units kag mga stakeholders sa komunidad para seguridad kag pag-uswag sang probinsya.
Nahibaluan nga ginlunsyar sang Capiz Police Provincial Office ang Proyekto “CAPeace–Tawayhan” sa pagpanguna ni Police Colonel David L. Cachumbo Jr., Officer-in-Charge sang CPPO.
