ROXAS CITY – Ginpanindugan sang pinuno sang Roxas City Emergency Response Team (RCERT) nga wala sang nangin kapaltahan ang ila hanay sa pagresponde sa nagluntad nga aksidente sa dalanon sa San Roque Street, Barangay Inzo Arnaldo, Roxas City kun sa diin na-stroke ang isa ka tricycle driver apang una nga nasal-an nga yara sa idalom sang impluwensiya sang makahulubog nga ilimnon.
Ini ang ginpahayag ni RCERT Head Ruel Bergantino sang mainterview sang Bombo Radyo.
Suno kay Bergantino nga apisar wala nakuhaan sang vital signs sang nagresponde nga katapo sang RCERT ang tricycle driver nga si Rolando Apanitan, gin-usisa ini kun may malain ini nga ginabatyag.
Apang gin-ako ni Bergantino nga posible bangud man sang kakapoy sang nagresponde nga mga katapo sang RCERT, wala na nila madumduman nga kuhaan sang vital signs si Apanitan.
Ginpanindugan man ni Bergantino nga indi makonsiderar nga pasyente si Apanitan bangud maayo ang iya nga kondisyon sang naabtan sang mga responders.
Ginpanindugan man sini nga gin himo sang RCERT ang ila responsibilidad para marespondihan ang insidente apang wala nagasabat si Apanitan kag nagprangka nga nagalain ang pamatyag iya nga pamatyag.
Suno pa kay Bergantino nga ang nasambit nga hitabo ang magaserbi nga ‘eye opener’ sa ila agud paayuhon pa ang ila nga trabaho.
Ginpasalig naman ni Bergantino sa publiko nga pasangkaron pa sang ila hanay sa pagpanerbisyo ilabi na sa pagresponde sa tion sang emerhensiya.
Gindugang pa sini nga nagpangayo naman sila sang pasaylo sa pamilya Apanitan bangud sa nasambit nga hitabo.
