ROXAS CITY – Suportado sang Roxas City Tricycle Operators and Drivers Association (RCTODA) ang ginaduso nga amendment sa Tricycle Franching Ordinance ni City Councilor Atty. Albert Gregory Potato.
Ginpahayag ni konsehal Potato, chairman sang Committee on Transportation and Public Utilities sang Sangguniang Panlungsod, kun tan-awon tanan nga nakapagkit sa ginaproponer nga pag-amyenda sa ordinansa ang nagasantu sa ila adbokasiya kag ginaduso sadto pa nga inisyatibo agud mabuligan ang gobyerno sang syudad nga matapna ang nagakahinabo nga iregularidad sa sektor sang tricycle.
Partikular nga gintumod ni Devela ang isyu sadto sa residency sang mga franchise holder nga kuntani mga residente lamang sang Roxas City ang mahatagan sang franchise sa ginapanag-iyahan nga tricycle, apang nagaguwa nga bisan indi residente sang syudad ang ginahatagan sang franchise.
Pabor man si Devela sa ginaproponer nga dugang nga mga rekisitos sa pagparenew sang frangkisa, pagiging transferable sa immediate family member sang franchise kag ang pagpalawig sa renewal sang frangkisa tobtob sa tatlo ka tuig agud matapna ang anomaliya.
Samtang ginkumpirma sini nga may yara sang franchise holder nga nagapanag-iya sang 15-20 ka mga franchise sa diin agud matago ang ginahimo nga anomaliya, may tawo nga nagaserbe nga dummy sa ginapanag-iyahan nga franchise.
Kasunod sini nagpangabay si Devela sa mga TODA Officers sa barangay nga indi paggamiton ang poder agud makapang-ipit sa ila kontra nga nagakuha sang sertipikasyon
Nagalaum man si Devela nga pinaagi sini nga tikang matadlong ang sala kag indi magsandig sa personal nga interes.
