Ginhiwat sa Roxas City ang 3rd Quarter Full Council Meeting sang Regional Disaster Risk Reduction and Management Council (RDRRMC), nga nagatinguha sa pagpalig-on sang kahandaan kag pagresponde sa tion sang mga kalamidad kag emerhensiya.
Talakayon sa pagsinapol ang nagkalainlain nga importante nga isyu kag programa may kaangtanan sa disaster risk reduction and management, lakip na ang weather update kag climate outlook nga magabulig sa mga ahensya kag local government sa pagplano sang nagakaigo nga tikang.
Ginpahayag man sang Department of Health (DOH) Region VI parte sa mga balatian nga nagatuhaw, partikular na ang leptospirosis kag dengue, agud mapabakod ang mga tikang sa paglikaw kag pagkontrol sang mga ini.
Lakip man sa agenda ang update sa Comprehensive Integrated Action Plan for El Niño gikan sa nagkalainlain nga sector, pati ang Synopsis of the Output of the Contingency Plan Formulation Workshop para sa Civil Defense.
Gindiskusyonan man ang iban pa nga programa kag inisyatibo sang mga ahensya nga nagabulig sa pagpalig-on sang disaster preparedness, response, kag koordinasyon sa bilog nga Western Visayas.
Pinaagi sa sini nga pagtililipon, ginapaabot nga mapabakod pa ang koordinasyon sang mga ahensya kag local government agud mas mangin handa kag episyente ang pag-atubang sa nagkalainlain nga peligro kag kalamidad sa rehiyon.
