ROXAS CITY – Nadihon ang pila ka mga kasugtanan sa ginpatigayon nga sinapol sang mga miyembro sang Regional Disaster Risk Reduction and Management Council (RDRRMC-6) agud mapasangkad pa ang kampanya batuk sa coronavirus disease (COVID-19).
Ini ang ginpahayag ni Office of the Civil Defense (OCD) 6 Regional Director Jose Roberto Nuñez.
Ang nasambit nga sinapol ang gintambungan sang mga opisyales gikan sa magkatuhay nga mga kaprobinsiyahanan sa Western Visayas.
Una diri, magahinyo ang OCD-6 sa 3rd Infantry Division-Philippine Army nga kun mahimo magamit ang ila nga air assets sa pag-transport sang Personal Protective Equipments (PPE’s) gikan sa Department of Health (DOH) central office padulong sa Rehiyon Sais.
Nasaad man diri ang pag-convene sang DOH kag pagtukod sang technical working group para sa pagdihon sang improvised materials bilang alternatibo sa PPE’s.
Ginamanduan man ang Philippine Ports Authority sa pag-verify sa ila nga central office natuhoy sa pagsulundan sa pagpasulod sang mga ‘goods’ sa rehiyon.
Ang tanan nga mga kaprobinsiyahanan kag Iloilo City sa Rehiyon Sais ang kinahanglan makadihon sang Executive Order sa pagpatuman sang borderline restrictions kun sa diin dapat siraduhan ang tanan nga borders sa tanan nga probinsiya tubtob sa Marso 31.
Ini agud mahatagan sang ligwa ang incubation period sang mga Persons Under Monitoring (PUM’s).
Matapos ang Marso 31, magadihon sang isa ka unified Panay Executive Order para sa community quarantine.
Magapanguna naman ang hanay sang Philippine National Police sa borderline patrol kag pagtumod sa mga strategic area nga ila pagatutokan.
Kinahanglan man nga may koordinasyon ang mga Provincial Disaster Risk Reduction and Management Office (PDRRMO) sa pulisya sa pagpatigayon sang checkpoints ukon patrolling sa mga borderline sang ila tagsa ka mga lugar.
Magapanguna naman ang OCD sa information-dissemination pag-abot sa borderline restrictions ukon community quarantine.
