PANAY, CAPIZ – Magapatigayon sang re-evaluation sang mga beneficiaries sang housing sa Poblacion Ilaya, Panay, Capiz antes irelease ang titulo.
Sa interview sang Bombo Radyo kay Panay Mayor Jonathan ‘Sonny’ Besa, iya ginpahayag nga nagpatigayon ang ila talatapan kaupod ang Inter-agency Committee Council kag National Housing Authority sa pagpanguna sang amo nga tikang.
Suno kay Mayor Besa, tinutuyo sang amo nga re-evaluation ang masiguro nga sa nagaka-angay nga mga benepisyaryo sang ginabulubanta 1,600 units nga housing projects ang magabaton gikan sa banwa sang Panay.
Pahayag pa niya, ang mga katapo lang sang National Housing Authority ang magalibot para sa inspection sa sulod sang tatlo ka adlaw kag indi mag-intra ang mga empleyado sang local government unit agud malikawan ang mga isyu sang pamulitika.
Sa subong, ginahulat na lang ni Mayor Besa ang mangin resulta sang re-evaluation antes mag-ubra sang desisyon sa pagpanagtag sang mga titulo.
Ginpasiguro man sang natungdan nga may yara sang igaplastar nga mga alternatibo nga solusyon sa maapektuhan sang amo nga pagre-evaluate.
INTERVIEWED BY: BOMBO ROADNIE DABAN DALANON VIA ZONA LIBRE
