ROXAS CITY – Nagdihon na sang tikang ang recruitment agency sang isa ka Capizeña OFW matapos personal nga nagpadulong sa ila nga talatapan ang pamilya ni Maricar Aligano sang Barangay Sinabsaban, Cuartero, Capiz kag ginpalab-ot ang ginaalegar pagpangsakit sang iya nga employer sa Kuwait.
Sa interview sang Bombo Radyo Roxas kay Mika Lozano, welfare assistance officer sang I-rekrut Manpower Agency, ginpahayag sini nga nagpakig-angut na sila sa ila nga partner agency sa Kuwait nga Mubarak Agency para sa pagpull-out sa nasambit nga OFW.
Suno kay Lozano, nabudlayan pa sila nga ma-locate ang ginatrabahuan ni Aligano bangud wala ini sa una nga address nga yara sa iya kontrata.
Natukiban na lamang sang agency nga nakaba-se sa karon sa Al Ardiya, Kuwait si Aligano.
Ginpasiguro man ni Lozano nga nagapangita na sang paaagi ang embahada sang Pilipinas sa Kuwait, agud ma reskyu si Aligano kag mapabalik sa Pilipinas.
