Gin-lift na sang National Grid Corporation of the Philippines (National Grid Corporation of the Philippines) ang Red Alert Status sa Visayas Grid matapos nga magbalik abg bastante nga suplay sang kuryente sa rehiyon.
Base sa pinakaulihi nga datos, ang available capacity ang naglab-ot sa 2,543 megawatts samtang ang demand sa kuryente yara sa 2,433 megawatts , nga nagapakita nga mas kontrolado na ang supply situation.
Bangud sini, ginkalipay sang mga distribution utilities ang pag-lift sang Red Alert Status, nga nagakahulugan nga wala na sang pamahog sa suplay sang kuryente sa rehiyon.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative, iya ginpahayag nga dako nga kasulhay ang pagbalik sang mas normal nga kondisyon sang suplay sang kuryente apisar pa nga nagapabilin ang Yellow Alert Status.
Suno kay Diaz, bisan manipis ang reserba sang kuryente, preparado ang mga makina sang CAPELCO agud makabulig nga malikawan ang mga wala ginapaabot nga power interruption sa ila coverage area.
Nagalaum man ang natungdan nga gilayon na nga magbalik sa normal ang suplay sang kuryente sa masunod nga mga inadlaw, ilabi na gid nga ginapaabot pa ang mas mainit nga panahon nga posible magpataas sang demand sa kuryente.
