Posible nga magasirado ang red sea kadungan sa pag-intra sang Yemeni Houthis sa kinagamo sa Middle East.
Suno kay Bombo Joseph Timothy Rivera, International Correspondent sa Qatar, iya ginpahayag nga
kon makontrol sang Iran ang Persian Gulf kag Strait of Hormuz, mahimo man nila nga makontrol ang Red Sea paagi sa mga Houthis, magatuga ini sang daku nga epekto sa sa international shipping.
Pahayag pa niya mas magataas pagid ang presyo sang mga balaklon sa global market kaangay sang gatong kag iban pa nga posible makahatag sang kabug-at sa iban nga mga pungsod.
Nahibaluan nga kilala ang grupo sang Yemeni houthis sa ila abilidad nga maglunsyar sang pagpang-atake apisar sang distansya sang ila target kag amo man sa pagsabotahe sang mga barko nga nagalabay sa Red Sea.
Samtang, padayon sa gihapon ang pagpang-atake sa pila ka mga Gulf Cooperation Council States, kaangay sang Saudi Arabia, United Arab Emirates, Bahrain kag Kuwait sa ila sini mga energy facilities, military sites, kag civilian infrastructure.
Dugang pa sang natungdan, magapatigayon sang peace talks ang Pakistan sa tunga sang pungsod sang Iran, Israel kag United States of America agud nga mapahagan-hagan ang paglala sang tensyon sa nasambit nga mga pungsod.
