ROXAS CITY – Ginkumpirmar ni Edwin Javier Provincial Fisheries Officer sang Bureau of Fisheries and Aquatic Resources (BFAR) – Capiz ang presensiya sang red tide sa kadagatan nga sakup sang banwa sang Milagros, probinsya sang Masbate apang negatibo pa diri sa probinsya sang Capiz.
Suno sa opisyal may posibilidad nga maglab-ot ang red tide sa Capiz bangud sa indi makontrol nga paghulag sang tubig.Nahibaluan nga ang red tide isa ka phenomenon kun sa diin indi mahibaluan kun san-o, kag diin ini magatuhaw.
Isa sa ginahimo nga tikang sang ahensiya amo ang maid-id nga monitoring sa kalalawran agud maproteksyunan ang mga pumuluyo ilabi na ang mga mangingisda ukon ang mga nagakaon sang isda kag mga panginhason ukon shells.
Nagpahanumdum man si Javier nga pananglitan may yara sang red tide sa isa ka lugar, likawan ang pagkaon sang isda ukon bisan ano nga sahi sang panginhason agud indi mabutang sa peligro ang ila kabuhi.Gin-athag man sang opisyal nga makbig nga filter feeder ang mga shells sa diin ila ginasala ang mga toxins nga nagapabilin sa lawas sang magakaon sini.
Kalakip sa mabatyagan sang naapektuhan sang red tide, amu ang pagpangdakmol sang bibig kag guya, pagpalang-init sang bilog nga itsura kag dughan.Apang kun malala ang epekto sang red tide, ang biktima mahimo nga magsuka kag magsakit ang ulo.
Pananglitan maka-experiensiya sini, gilayon nga magpadulong sa ospital agud madapatan sang nagakaigo nga pagbulong.
Nagpangabay man si Javier sa publiko nga sa tion nga may makit-an nga pagbag-o sa duag sang tubig sa dagat, gilayon nga ipahibalo sa talatapan sang BFAR-Capiz ukon Provincial Agriculture’s Office agud ma-monitor kun makahalalit ini sa mga pumuluyo.
